Развојот на вештачката интелигенција без соодветни заштитни механизми би можел да доведе до создавање нов „силиконски вид“, кој би се натпреварувал со луѓето за ресурси, предупреди шефот за вештачка интелигенција во „Мајкрософт“, Мустафа Сулејман.
Сулејман смета дека компаниите треба да бидат особено внимателни со развојот на системи кои би можеле самостојно да поставуваат цели, да заработуваат пари и да поседуваат средства.
„Луѓето со право се загрижени за вештачката интелигенција, но постојат многу практични работи што можеме да ги направиме за да ја контролираме“, изјави тој.
Тој, воедно, ја критикуваше конкурентската компанија „Антропик“ поради пристапот кон нејзиниот систем „Клод“, односно практиката на вештачката интелигенција да ѝ се припишуваат човечки особини, позната како антропоморфизација.
Според Сулејман, вештачките интелигенции не треба да се третираат како свесни суштества.
„Вештачките интелигенции не се свесни. Тие не чувствуваат, не искусуваат и не страдаат. Тие немаат вродени преференци или основни мотивации“, вели тој.
Сулејман предупредува дека создавањето системи со поголема автономија би можело да отвори нови ризици.
„Тоа, во суштина, би значело создавање нов силиконски вид, кој несомнено би можел да се натпреварува со нас за ресурси“, истакнува Сулејман.
„Мајкрософт“ го основа својот тим за суперинтелигенција во октомври 2025 година. Компанијата, како и „Антропик“, работи на развој на сè понапредни системи со вештачка интелигенција, додека истовремено расте дебатата за тоа како да се обезбеди нивниот безбеден развој и употреба.
