„Спејс-Екс“, компанијата на Илон Маск, преговара со банки и инвестициски компании за обезбедување околу 40 милијарди долари за набавка на чипови за вештачка интелигенција од „Енвидија“, објави „Ројтерс“, повикувајќи се на извори запознаени со разговорите.
Според информациите, планот е околу 10 милијарди долари да се обезбедат преку банкарски кредити, а дополнителни 30 милијарди долари преку долг со инвестициски рејтинг.
Се очекува инвестициската компанија „Аполо Глобал Менаџмент“ да го предводи аранжманот и да помогне во пласирањето на долгот кај поширок круг инвеститори. Меѓу финансиските институции со кои се разговара за учество е и „ПИМКО“.
Преговорите сè уште не се завршени, а според „Фајненшл тајмс“, трансакцијата би можела да биде реализирана во 2027 година.
Планираното финансирање ги покажува големите потреби за капитал што ги создава развојот на вештачката интелигенција, во услови кога технолошките компании забрзано инвестираат во напредни процесори и центри за податоци.
„Морган Стенли“ проценува дека за инфраструктурата поврзана со вештачката интелигенција до 2028 година ќе бидат потребни 1,5 билиони долари надворешно финансирање.
Маск минатиот месец изјави дека центарот за податоци „Колос 2“ на неговата компанија „xAI“ би можел до декември да го зголеми бројот на чипови на „Енвидија“ што ги користи за повеќе од двојно. Тој исто така наведе дека „Спејс-Екс“ планира во своите центри за податоци да користи исклучиво хардвер од „Енвидија“.
Во август „Енвидија“ заедно со „Аполо“, „Блекрок“, „Блекстоун“, „Брукфилд“, „Голдман Сакс“ и „ККР“ започна платформи за финансирање чија цел е мобилизирање повеќе од 500 милијарди долари за инфраструктурни проекти поврзани со вештачката интелигенција.
