Елон Маск ја разгледува можноста за спојување на „Тесла“ и „СпејсИкс“, со што под една компанија би ги обединил производството на електрични автомобили, вештачката интелигенција, роботиката и вселенската технологија. Сепак, експертите предупредуваат дека ваквиот потег, и покрај можните придобивки, би можел да донесе значителни ризици за акционерите.
Маск ја поддржал идејата и потврдил дека двете компании формирале посебни одбори што ја разгледуваат можноста за договор. Засега нема постигнато спогодба, а не е сигурно ниту дека спојувањето ќе се реализира.
„Тесла“ би ги внела технологијата за електрични возила, батерии и роботика, додека „СпејсИкс“ би придонел со ракетната и сателитската технологија. Експертите за „Анадолу“ ги анализирале можните последици врз работењето на компаниите, инвеститорите и купувачите.
Професорот по деловна економија на Универзитетот во Бирмингем, Дејвид Бејли, смета дека главната предност би била поврзувањето на знаењето и технологијата на двете компании. Тоа би можело да ги забрза плановите на Маск во областа на вештачката интелигенција и автономните системи, но слични придобивки би можеле да се постигнат и преку соработка, без сложен процес на спојување.
Консултантот Лу Ле од компанијата „Сино ауто инсајтс“ оценува дека обединувањето би го олеснило споделувањето технологии и ресурси, но и би му овозможило на Маск поголема контрола врз двете компании. Сепак, предупредува дека неговите деловни планови не мора секогаш да се совпаѓаат со интересите на акционерите.
Меѓу можните придобивки се и намалувањето на трошоците преку заедничко користење инфраструктура, центри за податоци, технологии за развој на чипови и сателитска инфраструктура. Сепак, не е сигурно дека заедничкото работење навистина би донело заштеди, наместо во една компанија да обедини повеќе скапи проекти.
Бејли предупредува дека акционерите на „Тесла“ би можеле да платат висока цена за преземањето на „СпејсИкс“, а притоа да преземат ризици од две компании со различни деловни модели. Спојувањето би можело и да ги намали нивните сопственички удели во новата компанија. Дополнителни пречки би биле процената на вредноста на компаниите, управувањето, можните судири на интереси и добивањето согласност од акционерите.
Отворено е и прашањето за иднината на големата фабрика на „Тесла“ во Шангај. Според Ле, спојувањето би можело да ја отвори можноста за нејзина продажба, што дополнително би го усложнило договорот. Потенцијалните купувачи би можеле да бараат значителен попуст поради вишокот производствени капацитети кај кинеските производители на автомобили.
За купувачите на возилата на „Тесла“, непосредните промени веројатно би биле ограничени, смета Бејли. Поголемите придобивки би можеле да се почувствуваат на долг рок, преку поврзување на вештачката интелигенција, роботиката, автономните возила и сателитските комуникации.
Ле посочува дека идните модели на „Тесла“ би можеле да користат сателитска интернет-врска преку „Старлинк“, додека одредени проекти би можеле да имаат корист од погонската технологија на „СпејсИкс“.
Долгорочните планови на Маск вклучуваат и користење на технологијата на двете компании за истражување и населување на Марс. Ле смета дека технологијата на „Тесла“ би можела да се користи за изработка на ровери, кои потоа би биле испратени на Марс со ракетите на „СпејсИкс“.
Експертите нагласуваат дека евентуалното спојување треба да се гледа како долгорочна стратешка одлука, а не како потег што веднаш би ги променил производите на двете компании. Засега останува неизвесно дали договорот ќе биде постигнат и дали потенцијалните придобивки ќе ги надминат финансиските и деловните ризици.
