Маж (38) загина по напад од ајкула во близина на островот Ротнест, во близина на Перт и брегот на Западна Австралија, соопштија светските медиуми.
Според наводите, мажот се наоѓал во близина на заливот Џорди околу 10 часот по локално време кога бил нападнат од ајкула, пренесе австралискиот портал 9news.
Полицијата на Западна Австралија соопшти дека итната медицинска помош не успеала да го реанимира откако бил извлечен од водата и пренесен на брегот.
Службата „Surf Life Saving Western Australia“ соопшти дека во близина на брегот била забележана голема бела ајкула долга околу пет метри.
Островот Ротнест е популарна туристичка дестинација во близина на градот Перт и е познат како природен резерват со плажи и заштитени морски подрачја.
Локалните власти се информирани за несреќата и е најавено дека ќе биде изготвен извештај, додека идентитетот на жртвата сè уште не е објавен.
Во Австралија во последните години се бележи низа напади од ајкули, вклучително и смртни случаи и тешки повреди на повеќе локации долж брегот.
Смртни случаи се пријавени и во САД, Мозамбик, Јужна Африка и Вануату.
Минатата година во американските води биле пријавени 25 инциденти, од кои 11 биле кај брегот на Флорида, додека Австралија била втора со 21 напад.
Истражувачи од Универзитетот во Флорида, кои водат база на податоци за нападите од ајкули, наведуваат дека е забележан пораст на случаи на смртоносни напади од големи бели ајкули.
Според нивната анализа, зголеменото присуство на ајкули во популарните сурф-зони, особено во Австралија, може да биде една од причините за порастот на инцидентите, додека австралиските води се населени и со бикови и тигар ајкули, кои заедно со големата бела ја сочинуваат таканаречената „голема тројка“ предатори.
