Мерил Стрип важи за една од најголемите актерки на сите времиња, но постои една улога за која со години чувствувала незадоволство и несигурност.
Станува збор за филмот „Жената на францускиот поручник“ од 1981 година, британска романтична драма снимена според романот на Џон Фаулс. Филмот го режирал Карел Рајс, а сценариото го напишал Харолд Пинтер.
Стрип во филмот ја толкувала Сара Вудраф – мистериозна поранешна гувернанта која започнува сложен однос со Чарлс Смитсон, лик што го играл Џереми Ајронс.
Иако филмот бил одлично прифатен од критиката, а Мерил Стрип добила и номинација за Оскар за најдобра актерка, таа подоцна признала дека никогаш не била целосно задоволна од својата изведба.
„Не чувствував дека го живеам тој лик“, изјавила актерката во едно интервју.
Таа открила и дека имала проблем со сопствениот изглед во улогата.
„Секогаш сакате нешто да поправите кога сè ќе заврши. Не можев да се помирам со тоа, сакав да бидам поубава“, рекла Стрип.
Според неа, чувствувала дека физички не одговара на ликот што го играла.
„Доаѓа момент кога мора да изгледате како ликот, особено на филм“, објаснила таа.
Актерката додала дека во викторијанската литература страста и забранетите чувства често се прикажуваат преку темнина, па затоа се обидела да го приспособи изгледот со потемна коса, но ни тогаш не била целосно задоволна.
„Навистина би сакала да сум тип на актерка која може само да стои и со тоа да каже сè“, признала Стрип.
И покрај нејзиното лично незадоволство, филмот останал еден од позначајните проекти во нејзината кариера. Покрај нејзината оскаровска номинација, и Харолд Пинтер бил номиниран за најдобро адаптирано сценарио.
