Аргентина избори пласман во осминафиналето на Светското првенство, откако по голема драма и продолженија ги совлада Зеленортските Острови со 3:2.
Иако „гаучосите“ двапати имаа предност со головите на Лионел Меси и Лисандро Мартинез, упорниот ривал успеа да се врати во игра, а победата на актуелниот светски шампион беше обезбедена дури во 111. минута со автогол.
По натпреварот, капитенот Лионел Меси истакна дека очекувал тежок дуел и ги пофали Зеленортските Острови.
„Знаевме дека натпреварот ќе биде многу тежок. Не е случајно што оваа репрезентација не загуби ниту од Шпанија ниту од Уругвај. Ние го направивме најтешкиот дел – постигнавме гол, но потоа, наместо да ја смириме играта, се случи токму спротивното“, изјави Меси.
Тој призна дека Аргентина не успеала да изврши доволен притисок врз противникот.
„Не успеавме добро да ги притиснеме, а тие се бореа со своето оружје. Ова Светско првенство е многу посебно, сè е многу изедначено и секој натпревар ќе биде исклучително тежок“, нагласи аргентинскиот капитен.
Меси истакна дека тимот секогаш покажува победнички менталитет.
„Секогаш одиме напред, без разлика дали игравме добро или лошо“, рече тој.
Според него, прекините биле клучниот фактор за победата.
„Пресудна беше играта по прекините. Можеби претходно не сме постигнувале голови од такви ситуации, но во вакви натпревари тоа е пресудно. Имаме добри играчи во воздушните дуели и успеавме да го искористиме тоа. Во вакво натпреварување, тој сегмент е исклучително важен, а тоа се потврди и на овој натпревар“, заклучи Меси.
