Судот во американската сојузна држава Ново Мексико ѝ наложи на компанијата Meta да плати 567 милиони долари и да воведе значајни промени во начинот на кој Facebook и Instagram функционираат за малолетните корисници, откако утврди дека компанијата му наштетила на менталното здравје на децата.
Судијата Брајан Бидшајд пресуди дека Meta создала „јавна штета“, прифаќајќи ги аргументите на државниот обвинител Раул Торез. Според обвинението, компанијата ги дизајнирала своите платформи така што предизвикуваат зависност кај младите и не обезбедила доволна заштита од сексуална злоупотреба.
Со судската одлука Meta е обврзана да воведе повеќе мерки за заштита на малолетниците, меѓу кои месечни ограничувања за користење на Facebook и Instagram, ограничувања на известувањата, построги правила за контакт меѓу возрасни и малолетници, дополнителни заштити за AI-чатботовите и поинтензивна проверка на пријавите за сексуална злоупотреба на деца. Овие мерки ќе важат во следните пет години.
Од Meta соопштија дека ќе ја обжалат пресудата и дека компанијата продолжува да работи на откривање и отстранување штетни содржини од своите платформи.
Пресудата следува по претходната одлука на поротата во март, кога беше утврдено дека Meta го прекршила законот за заштита на потрошувачите во Ново Мексико со погрешно прикажување на безбедноста на Facebook и Instagram за младите корисници.
Случајот внимателно се следи во САД, бидејќи повеќе сојузни држави, општини и училишни окрузи покренуваат слични постапки со цел да издејствуваат промени во целата индустрија на социјалните мрежи.
