Мета се соочува со нов судски процес во САД кој би можел сериозно да влијае врз начинот на кој младите ги користат Инстаграм и Фејсбук. Постапката ја покренаа 30 американски сојузни држави, меѓу кои Калифорнија и Њујорк, со тужба поднесена во 2023 година.
Државите ја обвинуваат компанијата дека ги прекршила федералните и државните закони за заштита на приватноста на децата и дека намерно ги дизајнирала своите платформи така што младите корисници што подолго да останат активни.
Покрај отштета која надминува 860 милијарди евра, тужителите бараат и значителни промени на Инстаграм и Фејсбук. Меѓу нив се укинување на бројот на допаѓања, бесконечното прелистување на содржини и автоматското пуштање видеа.
Од државите бараат и воведување родителска проверка за тинејџерите, промена на алгоритмите за препорачување содржини, отстранување на дел од филтрите со кои се менува физичкиот изглед, како и ограничување на можноста за отворање повеќе кориснички профили.
На листата на барања е и укинување на содржините што исчезнуваат, како Инстаграм сториња, како и ограничување на известувањата со кои корисниците се поттикнуваат повторно да ги отворат апликациите.
Државите тврдат дека овие функции се создадени со цел да ги задржат децата и тинејџерите на платформите што подолго и што почесто. Мета ги отфрла обвинувањата и тврди дека доказите ќе покажат оти компанијата со години работи на поддршка и заштита на младите корисници.
Процесот се одвива пред федералната судијка Ивон Гонзалес Роџерс во Калифорнија, а исходот би можел да има последици за работењето на Мета на територијата на целиот САД.
Дополнителен притисок врз компанијата претставува и неодамнешната пресуда во Ново Мексико, каде што судот ја казни Мета со 942 милиони долари и ѝ наложи промени слични на оние што сега ги бараат и другите држави.
Доколку тужбата на 30-те држави биде успешна, промените би можеле да важат низ целата земја, бидејќи државите што ја поднеле тужбата опфаќаат речиси две третини од населението на САД.
