„Мета“, компанијата која ги поседува „Фејсбук“ и „Инстаграм“, претстави нов модел на вештачка интелигенција кој може да работи директно на обичен компјутер, без постојана поврзаност со серверите на компанијата.
Моделот Muse Glimmer ќе можат слободно да го преземаат и користат корисниците и програмерите, а неговиот отворен код ќе може да се менува според нивните потреби. Моделот е помал и оптимизиран за извршување посложени задачи, меѓу кои програмирање и други активности што ги извршуваат агентите со вештачка интелигенција.
„Мета“ истовремено најави дека ќе ги објави и тежините на помоќниот модел Muse Spark 1.2, кој компанијата го опишува како еден од своите најнапредни модели. Според компанијата, тој располага и со алатка за програмирање, способна самостојно да планира, извршува и проверува сложени промени во големи софтверски проекти.
Марк Закерберг, пак, во обраќањето „Иднината е за сите“ ја бранеше идејата за отворена вештачка интелигенција и предупреди дека најмоќните системи не треба да бидат концентрирани во рацете на мал број големи компании или институции.
Шефот на „Мета“ оцени дека вештачката интелигенција треба да им даде поголема моќ на поединците, програмерите и малите компании. Тој повторно го промовираше концептот на „лична суперинтелигенција“, односно моќни системи кои директно би им биле достапни на луѓето.
Закерберг истовремено предупреди дека САД можат да ја изгубат предноста во развојот на отворените модели, особено во однос на Кина, каде што компании како „Дипсик“, „Алибаба“ и З.АИ развиваат сè поконкурентни модели.
Тој побара американските власти да избегнуваат ограничувања кои, според него, би можеле да го забават развојот на домашните отворени модели. Закерберг ја бранеше и таканаречената „дестилација“, при која помал модел се обучува со помош на резултатите од поголем и помоќен модел. Според објавените информации, на овој начин е создаден и Muse Glimmer, користејќи го Muse Spark.
