Клима-уредите се незаменливи за време на летните горештини, но многумина се убедени дека токму тие се причина за болки во грлото, главоболки и симптоми слични на настинка. Експертите, сепак, објаснуваат дека работите не се толку едноставни.
Според пулмологот и професор на Медицинскиот факултет при Универзитетот „Џонс Хопкинс“, д-р Вилијам Чекли, подолгиот престој во климатизирани простории може да предизвика почести респираторни тегоби, но тоа не значи дека климата сама по себе предизвикува инфекции.
Сувиот воздух што го создава климатизацијата може да ги исуши слузниците на носот и грлото, како и кожата и очите. Поради тоа се јавуваат чувство на гребење во грлото, суви очи, испукани усни и други непријатности, кои многумина погрешно ги толкуваат како настинка.
Лекарите нагласуваат дека вирусните заболувања, како што се настинка, грип или воспаление на грлото, ги предизвикуваат вируси, а не студениот воздух од клима-уредот.
Сепак, поголем проблем можат да бидат нечистите филтри. Ако не се одржуваат редовно, во нив се собираат прашина, полен, мувла и други алергени, кои потоа циркулираат низ просторијата. Кај лицата со алергии или астма тоа може да предизвика кивање, кашлица, затнат нос, иритација на очите и отежнато дишење.
Дополнителен ризик претставува и големата разлика меѓу надворешната и внатрешната температура. Наглото преминување од надворешни 35–37 степени во просторија разладена на 18 или 19 степени може да предизвика главоболка, замор, вртоглавица и мускулна напнатост, особено кај децата и постарите лица.
Експертите препорачуваат температурата на клима-уредот да не биде поставена прениско. Разликата меѓу надворешната и внатрешната температура не треба да биде поголема од шест до осум степени. Тоа значи дека ако надвор има 35 степени, во просторијата е препорачливо температурата да биде околу 27 степени.
Редовното чистење и сервисирање на клима-уредот, заедно со умерено користење и избегнување нагли температурни разлики, се најдобриот начин за безбедно разладување во текот на летните горештини.
