Додека многумина во шеесеттите години размислуваат за пензионирање и помирен живот, 62-годишната Бриџит Рајс од Велика Британија решила да започне сосема ново поглавје. Ја продала својата куќа, ја напуштила работата и тргнала на патување низ светот. За три години посетила 15 земји и потрошила околу 70.000 евра, а денес вели дека не би ја променила својата одлука.
Желбата за промена се појавила за време на одмор во Тунис. Во тоа време, Рајс работела како оперативна менаџерка во хотелскиот сектор, но помислата дека треба да работи уште осум или девет години не ѝ се допаѓала.
„Имав лоша работа, бев целосно исцрпена, а хипотеката ќе ја отплатев дури на 70 години. Тоа, во суштина, ја одреди мојата судбина“, се присетува таа.
Непосредно пред да наполни 60 години, ја продала куќата во близина на Бат, во областа Сомерсет, за речиси 500.000 евра и дала отказ. Наскоро потоа, како што раскажува, со широка насмевка трчала низ аеродромот, подготвена за нови авантури.
На почетокот патувала со пријателка, но кога пристигнале во Шри Ланка, таа сфатила дека животот на пат не е за неа. Рајс тогаш морала да одлучи дали ќе се врати со неа или ќе продолжи сама.
„Имав избор – да заминам со неа или да продолжам сама. Но, не бев подготвена да се откажам“, вели Британката.
Така започнала да патува сама и досега посетила повеќе земји, меѓу кои Грција, Шпанија, Франција, Турција, Египет, Шри Ланка, Тајланд, Виетнам, Камбоџа и Сингапур.
Според неа, патувањата ѝ овозможиле поинаку да се погледне себеси и да се ослободи од секојдневните улоги што ги има дома.
„Кога патувате, општествените улоги привремено исчезнуваат. Дома сте мајка, партнерка или вработена. На пат тие ознаки исчезнуваат и почнувате вистински да бидете свои“, објаснува таа.
Во моментов живее од парите добиени од продажбата на куќата, а вели дека во тоа ѝ помогнал и биткоинот. Дополнително, животот во Југоисточна Азија е значително поевтин отколку во Велика Британија.
„Во Виетнам или Тајланд можам да живеам за околу 250 евра, вклучувајќи ги сите трошоци“, вели Рајс.
Неодамна се вратила во Велика Британија за да го посети семејството, но не планира долго да остане. Нејзината следна цел е повторно да замине за Тајланд.
Таа не се оптоварува премногу со тоа како ќе изгледа нејзиниот живот во подоцнежните години.
„Можеби еден ден ќе бидам осумдесетгодишна жена што живее во камп-приколка, но за тоа ќе размислувам кога ќе дојде време“, вели Бриџит, која и понатаму сака да го истражува светот.
