Со преминот од лето кон есен, собните растенија бараат поинаква нега, но многумина продолжуваат да ги одржуваат на истиот начин како во текот на летото. Токму тука, според ботаничарката Линдзи Пангборн, се прави една од најголемите грешки.
Прекумерното полевање може да биде проблем
Најчеста грешка во овој период е продолжувањето со летниот ритам на полевање. Собните растенија немаат потреба од толку вода како во текот на топлите месеци, особено во есен и зима, кога деновите се пократки, а растот се забавува.
Прекумерното полевање најчесто доведува до гниење на коренот, бидејќи растението не може да добие доволно воздух.
Ако не сте сигурни дали е време за полевање, постои едноставен тест. Ставете го прстот во земјата на длабочина од околу 2 до 7 сантиметри. Ако почвата е влажна, нема потреба од полевање. Ако е сува, наводнете го растението додека водата не почне да истекува низ дупките на дното од саксијата.
Важно е потоа да не оставате вода во подметачот – истурете ја.
Со есента престанете и со прихранувањето
Со доаѓањето на постудените денови, растенијата постепено влегуваат во период на мирување, па дополнителното прихранување најчесто не е потребно.
„Оставете ги растенијата да одмораат во текот на зимата, тоа им е важно“, советува Пангборн.
Растенијата кои во текот на топлите месеци биле на тераса или во дворот треба навреме да се внесат во домот.
Ботаничарката советува тоа да се направи пред ноќните температури да паднат под 12 степени Целзиусови.
Пред да ги внесете, исчистете ги од суви листови и гранчиња, отстранете ги остатоците од почвата околу нив и внимателно проверете дали има штетници.
Во зима влагата во воздухот станува многу важна
Со почетокот на грејната сезона, воздухот во домовите станува многу посув. Радијаторите можат брзо да ја намалат влажноста, поради што листовите на растенијата може да почнат да се сушат и да добиваат кафени рабови, дури и кога почвата е доволно влажна.
Поголемиот дел од собните растенија потекнуваат од тропски подрачја и сакаат повисока влажност.
Еден од начините за зголемување на влажноста е користење навлажнувач на воздухот. Друга едноставна опција е на поголем подметач да ставите камчиња и малку вода, а саксијата да ја поставите над камчињата така што да не ја допира водата. Со испарувањето, водата ќе ја зголеми влажноста околу растението.
Повремено истуширајте ги листовите
Прашината што се собира на листовите може да влијае на растението, па затоа повремено може нежно да ги измиете или истуширате листовите.
Важно е да внимавате и на местото каде што го чувате растението. Промената на условите во текот на есента може да влијае на количината на сончева светлина што ја добива.
На пример, растение кое се наоѓа покрај прозорец и во текот на летото било заштитено од сенката на дрвјата, наесен може да биде изложено на многу посилни директни сончеви зраци откако ќе паднат лисјата. Во таков случај, растението треба да се премести за да не му изгорат листовите.
Со неколку едноставни промени во полевањето, влажноста, прихранувањето и местоположбата, собните растенија полесно ќе го поминат периодот од есен до зима.
