И најголемите холивудски ѕвезди имаат филмски неуспеси зад себе. Некои остварувања не ги оправдале очекувањата на публиката, други биле остро критикувани, а дел од нив останале запаметени како најслабите улоги во кариерата на познатите актери.
Меѓу нив е „Жена-мачка“ со Хали Бери, филм што требало да понуди суперхеројска приказна, но бил критикуван поради слабиот дијалог и начинот на кој бил изведен. Рајан Гослинг, пак, се појавил во психолошкиот трилер „Остани“, кој добил негативни критики поради мрачниот пристап и недостигот од хумор.
Ниту Сандра Булок не успеала да го повтори успехот на првиот филм „Мис тајна агентка“. Продолжението „Мис тајна агентка 2: Вооружена и прекрасна“ од 2005 година не оставило ист впечаток, а самата актерка подоцна изјавила дека филмот воопшто не требало да биде снимен.
Бен Афлек, пак, отворено зборувал за лошото искуство за време на снимањето на „Лигата на правдата“. Како причини ги навел личните проблеми, разводот, несогласувањата околу насоката на филмот и повторното снимање по личната трагедија на режисерот Зак Снајдер. Афлек претходно се соочил со разочарувачки прием и со романтичната комедија „Џили“, во која глумел заедно со Џенифер Лопез.
На списокот на филмски промашувања се најде и „Супермен 4: Потрага по мирот“, во кој Кристофер Рив по четврти пат го толкуваше познатиот суперхерој. Комедијата „Џек и Џил“ со Адам Сендлер, во која актерот игра машки и женски лик, исто така не ги исполнила очекувањата, и покрај појавувањето на Ал Пачино.
„Турист“ со Анџелина Џоли и Џони Деп добил претежно негативни критики, меѓу другото и поради недостигот од меѓусебна привлечност меѓу главните актери и бавното одвивање на приказната. Сепак, филмот остварил успех на благајните.
Меѓу послабо прифатените остварувања е и воената драма „Лавови за јагниња“, во која глумат Мерил Стрип и Том Круз, а режијата ја потпишува Роберт Редфорд. Критичарите ја оцениле негативно приказната, а филмот не успеал да оствари профит.
