Она што требало да биде обична проба на венчаница во салон во Нант, Франција, се претворило во жесток конфликт меѓу сопственичката на салонот и две клиентки, по што сите три жени биле приведени.
Младата невеста минатата недела дошла во салонот со својата мајка за да проба венчаница. Сепак, меѓу нив и сопственичката веќе постоела напнатост поради претходно поместување на терминот за проба. Незадоволните клиентки оставиле и коментари на социјалните мрежи, што дополнително ја влошило ситуацијата.
За време на пробата дошло до ескалација. Според сведоци, сопственичката во едната рака држела метална шипка за закачување облека, а во другата ножици, додека расправијата прераснала во физички конфликт.
Полицијата интервенирала на местото, а во инцидентот немало потешко повредени лица. Сепак, целиот настан бил снимен, а и сопственичката и двете клиентки поднеле пријави.
Сите три жени ја поминале ноќта во полициска станица. Следниот ден, Обвинителството во Нант побарало тие да бидат ослободени и одлучило случајот да биде упатен на кривична медијација, постапка преку која страните можат да го решат спорот без започнување судска постапка.
