Актерката Натали Портман (45) стана мајка по третпат, откако со францускиот музичар и продуцент Танги Дестабл, познат како Tepr, го доби своето прво заедничко дете.
Веста ја објави магазинот „People“, повикувајќи се на извор според кој бебето е родено минатиот месец во Париз. Полот и името на новороденчето засега не се објавени.
Портман веќе има две деца – 15-годишниот син Алеф и 9-годишната ќерка Амалија, кои ги доби во бракот со кореографот Бенџамин Милепид. Двојката се разведе во 2024 година, по повеќе од една деценија заеднички живот.
Актерката последните години живее во Париз, каде што по разводот ја започна врската со Дестабл. Тие се заедно повеќе од една година.
Портман претходно годинава потврди дека е бремена и отворено зборуваше за своите чувства во врска со бременоста.
„Многу сум благодарна. Знам дека тоа е голема привилегија и чудо“, изјавила таа, додавајќи дека бременоста и родителството носат и убави и тешки моменти.
Во разговор за „Harper's Bazaar“ тогаш навести дека можеби станува збор за нејзината последна бременост.
„Знаејќи дека веројатно е последен пат, уживам во секој момент“, рекла Портман.
Актерката приватниот живот и децата главно ги држи подалеку од јавноста, па засега не е познато дали ќе објави фотографии од новороденчето.
