Германската сојузна разузнавачка служба (БНД) започна необична кампања за регрутирање нови кадри, а меѓу главните цели се – гејмерите.
Како што пренесува британски „Телеграф“, повикувајќи се на извори запознаени со плановите на службата, претставници на БНД ќе учествуваат на саемот за видеоигри Gamescom 2026 во Келн, каде што ќе се обидат да ја пронајдат новата генерација експерти за сајбер-војување.
Во германската разузнавачка служба сметаат дека постои „значително преклопување“ меѓу вештините што ги развиваат гејмерите и способностите потребни за работа во разузнавачката служба. Тоа вклучува технолошка стручност, решавање проблеми, истрајност, како и способност за преземање различни улоги.
Кандидатите кои ќе го привлечат вниманието на БНД ќе бидат поканети да поминат предизвик во пет чекори, осмислен за проверка на нивните способности во областа на сајбер-безбедноста и хакирањето.
БНД за потребите на кампањата разви и сопствена видеоигра под називот „BND Legends“, која на посетителите ќе им биде достапна на штандот на службата за време на Gamescom.
Портпаролката на БНД, Јулија Лајнер, изјави дека луѓето кои ќе бидат регрутирани преку оваа кампања би можеле да станат дел од „новиот БНД“, кој ќе биде формиран во рамките на поширока реформа на германската разузнавачка служба.
„Гледаме значително преклопување меѓу играчите и клучните таленти што ги бараме. Тие се технолошки потковани, уживаат во преземањето различни улоги, извршувањето мисии и истрајувањето додека не успеат“, рекла Лајнер за британскиот весник.
Владата на германскиот канцелар Фридрих Мерц минатата недела одобри пакет реформи на БНД, со кој на службата би требало да ѝ се прошират можностите за дејствување во странство.
Меѓу предложените нови овластувања е и можноста за спроведување саботажи, како и директен одговор на сајбер-напади.
Токму таканаречениот „hack back“, односно возвраќање на сајбер-напади, претставува една од најзначајните новини во предложените реформи, наведува „Телеграф“.
Германија во последните години беше мета на низа сајбер-напади за кои се сомнева дека се поврзани со Русија. Еден од најпознатите случаи се случи во 2024 година, кога Москва пресретна доверлив разговор на високи офицери на германските воздухопловни сили за воената стратегија во Украина.
Русија, покрај за сајбер-напади, е осомничена и за планирање атентати врз раководители на германски одбранбени компании, подметнување пожари во фабрики кои ја снабдуваат Украина, како и поставување бомби на германски аеродроми.
