„Нетфликс“ најави нова документарна серија во три дела за животот и наследството на Метју Пери, актерот кој светската слава ја стекна со улогата на Чендлер Бинг во серијата „Пријатели“. Премиерата на „The One About Matthew Perry“ е закажана за 27 октомври, три години по неговата смрт.
Документарната серија ќе го прикаже неговиот пат до славата, но и тешките моменти од приватниот живот и долгогодишната борба со зависноста. Приказната ќе биде раскажана преку сеќавањата на неговото семејство и најблиските пријатели, а ќе бидат прикажани и досега необјавени фотографии и снимки од семејната архива.
Неговата помлада сестра Миа Пери Бовик за првпат јавно ќе зборува за братот со цел, како што вели, да го прикаже како целосна личност, а не само како Чендлер или човек кој се борел со зависност.
„Сакав да покажам како беше да се сака Метју со сите сложености на неговиот живот“, изјавила таа.
Серијата ја режира добитничката на „Еми“ Мери Робертсон, која го опишала Пери како еден од најголемите комичарски таленти на својата генерација. Таа посочила дека јавноста ја знаела само делумно неговата приказна, иако актерот отворено зборувал за зависноста.
Метју Пери почина на 28 октомври 2023 година, на 54-годишна возраст. Како причина за смртта биле наведени акутните ефекти од кетамин. Актерот во текот на животот отворено зборуваше за борбата со зависноста и откри дека 15 пати бил на рехабилитација.
По неговата смрт, семејството и пријателите ја основаа фондацијата „Matthew Perry House“ во Канада, која има цел да го зачува неговото наследство и да им помогне на луѓето кои се борат со зависност.
Документарната серија „The One About Matthew Perry“ на „Нетфликс“ ќе биде достапна од 27 октомври.
