Netflix се соочува со тужба вредна најмалку 105 милиони долари, откако од неговите канцеларии исчезнала необјавена копија од воениот шпионски трилер „Fortitude“.
Тужбата ја поднеле продуцентот и сценарист Сајмон Афрам и неговата компанија Op-Fortitude пред федерален суд во Калифорнија. Тие тврдат дека кражбата сериозно ги загрозила шансите за продажба и дистрибуција на филмот.
Според наводите, главната нешифрирана копија од филмот се наоѓала на еден од неколкуте хард-дискови што минатиот месец биле украдени од канцелариите на Netflix. Внатрешната истрага на компанијата покажала дека останатите украдени дискови биле празни.
Од Netflix ги отфрлаат обвинувањата дека се одговорни за загубата, наведувајќи дека филмот бил доставен без стандардните безбедносни мерки што се применуваат во филмската индустрија.
„Иако не ги поседуваме правата за филмот „Fortitude“, безбедноста на содржината ја сфаќаме многу сериозно. Спроведовме детална истрага и ги следиме познатите пиратски страници за да спречиме неовластена дистрибуција“, соопшти портпарол на Netflix.
Во тужбата се наведува дека Netflix во декември 2025 година покажал интерес за откуп на филмот, а во јуни побарал работна верзија за интерна проекција. Продуцентот лично го доставил хард-дискот во канцелариите на компанијата во Лос Анџелес и побарал содржината да биде избришана веднаш по проекцијата.
Десет дена подоцна, од Netflix ги известиле авторите дека хард-дискот бил украден.
Авторите тврдат дека поради кражбата биле принудени привремено да ги прекинат преговорите со потенцијални домашни и странски дистрибутери, бидејќи секој купувач мора да биде информиран дека нешифрирана копија од филмот исчезнала пред неговата премиера.
„Fortitude“, во режија на Сајмон Вест, е инспириран од вистинска приказна за британски разузнавачи кои за време на Втората светска војна користеле сложени операции за да го измамат нацистичкото раководство. Главната улога ја толкува Николас Кејџ, а во актерската екипа се и Метју Гуд, Ед Скрејн, Жорди Моља и Алис Ив.
