Необична кражба го изненадила Загрепчанецот Јосип Црњец, кој на почетокот на неделата го затекнал автомобилот без задните врати. Тој со сопругата и детето дошол до возилото, по што сфатиле дека вратите биле украдени.
„Прво дојде сопругата, јас зад неа, и ми вели: ‘Јосипе, ги нема вратите на автомобилот’. Ѝ одговорив: ‘Дај, Доротеа, како ги нема вратите?’ Кога стигнавме до автомобилот, навистина ги немаше“, раскажал Јосип за RTL Danas.
Тој утрото планирал да оди на работа со автомобилот, бидејќи поради проблеми со превозот не успеал да најде друга можност. Се обидел да повика такси, но ниту едно возило не прифатило, а немало ниту слободен јавен велосипед. На крајот, ја повикал сопругата да дојде по него со детето.
Дополнителен проблем бил тоа што автомобилот не бил нивен, туку го позајмиле од сестрата на сопругата. Според Јосип, таа особено се плашела некој да не ѝ го украде автомобилот. Пред месец или два, на истото возило некој ѝ ги дупнал гумите, а сега биле украдени и задните врати.
Јосип проценува дека вредноста на украдените врати е околу 400 евра. Откако објавил фотографија во група на „Фејсбук“, случајот предизвикал голем број реакции. Меѓу оние што му се јавиле бил и човек кој понудил бесплатно да ги офарба новите врати доколку Јосип ги набави.
Од загрепската полиција потврдиле дека ваквите кражби се ретки, иако провалите во автомобили се редовна појава. Според полициските податоци, минатата година на подрачјето на Загреб и Загрепската Жупанија биле евидентирани 2.512 провални кражби, од кои 473 биле поврзани со моторни возила.
Автомобилот во меѓувреме е поправен и на него се поставени нови врати. Полицијата извршила увид и започнала криминалистичко истражување.
