„Нинтендо“ конечно го прикажа гејмплејот од долгоочекуваниот римејк на култната игра „The Legend of Zelda: Ocarina of Time“, откривајќи нови механики, подобрена графика и датум на излегување.
Римејкот на класиката од 1998 година ќе биде објавен ексклузивно за Nintendo Switch 2 на 5 ноември 2026 година. Деталите беа претставени во рамки на специјалниот „The Legend of Zelda 40th Anniversary Direct“.
Продуцентот на серијалот „The Legend of Zelda“, Еиџи Аонума, објасни дека тимот не се определил за целосно реалистичен изглед, туку за визуелен стил кој треба да потсетува на атмосферата на оригиналната игра.
Во прикажаниот дел од почетокот на играта се гледаат обновени локации како Kokiri Forest, Hyrule Field, Death Mountain и Hyrule Castle Town.
Римејкот носи и низа промени во гејмплејот. Играчите ќе добијат слободна камера, можност за рачно скокање и пливање, проширени дијалози и контроли со движење. Наместо постојано превртување за побрзо движење, сега е достапна и посебна функција за спринт.
Промени има и кај свирењето на окарината. На Nintendo Switch 2 ќе биде овозможено и пеење преку вградениот микрофон, а ќе има и поддршка за физичка реплика на контролерот.
По повод 40-годишнината на серијалот, „Нинтендо“ најави и специјално издание на Switch 2, Joy-Con контролери и док со мотиви инспирирани од Triforce. Во понудата ќе има и посебен Pro Controller и торбичка за конзолата со соодветен дизајн.
Специјалната конзола и дополнителната опрема ќе бидат достапни од 29 октомври 2026 година, неколку дена пред излегувањето на римејкот.
