Nintendo спроведе досега една од најголемите акции против емулаторите за својата конзола Switch, при што од GitHub биле отстранети повеќе од 400 репозиториуми.
По гасењето на познатите емулатори Yuzu и Ryujinx во 2024 година, почнаа да се појавуваат нивни клонови и различни продолженија. Nintendo сега се насочи токму кон тие проекти.
Според TorrentFreak, компанијата во само еден ден поднела седум барања според американскиот DMCA закон, со кои биле опфатени бројни деривати на Yuzu, како и емулаторите Skyline и MonoNX.
GitHub ги обработил барањата низ цели мрежи на поврзани репозиториуми, што резултирало со отстранување на стотици проекти.
Најголем удар претрпел Suyu, проект кој бил замислен како продолжение на Yuzu. Од GitHub биле отстранети околу 311 репозиториуми поврзани со Suyu.
На мета бил и Skyline, емулатор на Switch наменет за Android уреди, како и MonoNX, помалку познат емулатор напишан во програмскиот јазик C#.
Во своите пријави Nintendo тврди дека овие емулатори користат неовластени криптографски клучеви за декриптирање на ROM-датотеки со Switch игри, што компанијата го користи како основа за своите DMCA барања.
Сепак, бидејќи голем дел од кодот на овие проекти веќе е копиран и пресликан на други места, се очекува нови клонови повторно да се појавуваат.
Така продолжува долготрајната „игра на мачка и глушец“ меѓу заедницата која се занимава со емулaција и правниот тим на Nintendo.
