Финската телекомуникациска компанија Nokia планира затворање на речиси сите свои локации во Кина до крајот на 2026 година, како дел од пошироко намалување на своето работење во земјата, објави „South China Morning Post“.
Според извори запознаени со ситуацијата, затворањето на локациите и намалувањето на бројот на вработени ќе се одвива постепено до крајот на годината.
Од Nokia потврдиле дека компанијата презема мерки за подобро усогласување на своето работење во Кина со глобалната состојба. Од финската компанија наведуваат дека нејзиниот бизнис во Кина во последните години континуирано опаѓал, поради што ја приспособува својата оперативна присутност за да одговори на новите услови.
Nokia засега не соопшти колку точно работни места и локации ќе бидат опфатени со преструктурирањето.
Финската компанија во Кина работи повеќе од четири децении, а земјата некогаш беше еден од нејзините најважни поединечни пазари. Во последните години Nokia се соочува со зголемена конкуренција од домашните кинески производители на телекомуникациска опрема.
По објавувањето на информациите за планираното намалување на работењето во Кина, акциите на Nokia забележале пад.
