Норвешка подготвува построги правила за употребата на паметните очила и сличните уреди поради загриженост за приватноста и заштитата на личните податоци.
Станува збор за уреди со вградени камери, микрофони и екрани за проширена реалност кои овозможуваат снимање, но и прикажување информации директно во видното поле на корисникот.
Норвешкото Министерство за дигитализација и јавна администрација побарало построга регулација, а јавниот и приватниот сектор се повикани да разгледаат сопствени правила за користење на ваквата технологија.
Министерката за дигитализација и јавна администрација Каријане Тунг изјавила дека новата технологија носи ризици за приватноста и заштитата на податоците.
„Тоа, на пример, би можело да вклучува забрана на функции како препознавање лица на други луѓе на јавни места“, рекла Тунг.
Министерството најавило и формирање стручна група која ќе дава препораки за начинот на регулирање на паметните очила и сличните уреди.
Употребата на паметните очила во последните месеци предизвикува сè поголеми дебати. Критичарите предупредуваат дека уредите можат да се користат за тајно снимање и надзор, додека нивните поддржувачи истакнуваат дека технологијата може да биде особено корисна за лицата со попреченост, вклучително и за слепите и слабовидните лица.
