На „Вацап“ е откриен безбедносен пропуст кој, според досега објавените информации, може да овозможи пристап до фотографиите во галеријата на одредени „Андроид“ телефони дури и кога уредот е заклучен.
Пропустот го објавил безбедносниот истражувач Хозе Родригез на платформата „Икс“, прикажувајќи како може да се искористи. Проблемот се појавува за време на видеоповик на „Вацап“. На заклучен телефон можно е да се одговори на повикот без претходно отклучување, што само по себе е вообичаена функција.
Сепак, откако ќе започне видеоповикот, може да се отвори менито со ефекти и позадини. При изборот на „Backgrounds“ и активирањето на функцијата Meta AI за создавање или уредување фотографија, се појавува безбедносниот проблем.
Според прикажаното сценарио, доколку се избере уредување на постоечка фотографија, „Вацап“ може директно да ја отвори галеријата на телефонот иако уредот сè уште е заклучен. Тоа значи дека лице со физички пристап до заклучениот телефон потенцијално би можело да пристапи до фотографиите зачувани во него.
Пропустот, според досега достапните информации, не се појавува кај сите „Андроид“ уреди. Наводно е забележан кај одредени модели на „Опo“ и „Виво“, додека досегашните тестови не покажале проблем кај телефоните на „Самсунг“.
Можно е причината да е поврзана со начинот на кој одредени прилагодени верзии на „Андроид“ управуваат со заклучениот екран и функциите достапни без отклучување на телефонот.
Засега не е познато колку модели се погодени, ниту дали „Вацап“ веќе подготвил официјална исправка.
