Роверот „Персеверанс“ на НАСА поминал 45,2 километри на површината на Марс, со што го поставил рекордот за најдолго растојание поминато од возило на друго небесно тело, соопшти американската вселенска агенција.
Роверот со големина на автомобил и шест тркала е испратен на Марс за да истражи дали на планетата некогаш постоеле услови погодни за живот на микроорганизми.
Од НАСА велат дека опремата и научните инструменти на „Персеверанс“ се во одлична состојба, а достапни се и резервните системи, иако леталото работи речиси пет години. За успехот особено придонел системот за автономна навигација „AutoNav“, кој му овозможува на роверот самостојно да ја анализира околината, да создава тридимензионални карти и да избира безбедна патека.
Со ова достигнување е надминат претходниот рекорд на роверот „Опорчјунити“, кој од 2004 до 2018 година поминал нешто повеќе од 45 километри на Марс. Првичниот план предвидувал „Персеверанс“ да помине само 20 километри.
НАСА неодамна ја продолжила мисијата на роверот, кој треба да го истражува работ на кратерот Језеро. Се очекува активностите да продолжат приближно до крајот на 2028 година.
Кратерот Језеро, кој се наоѓа на северната полутопка на Марс, е избран за истражување бидејќи се смета дека пред милијарди години бил исполнет со вода и претставувал езерски басен.
