Сè поголем број нови автомобили наместо класична шипка за мерење на нивото на моторното масло користат електронски сензори и предупредувања на инструмент-таблата. Производителите тврдат дека овој систем е попрецизен и поедноставен за возачите, но промената има и свои недостатоци.
Шипката за проверка на маслото со децении беше еден од наједноставните начини возачот да ја провери состојбата на моторот. Денес, кај одредени модели, нивото на маслото се проверува преку дигитален екран, често преку менито на мултимедијалниот систем или инструмент-таблата, пишува „CarScoops“.
Според објаснувањата на претставници на компаниите „Стелантис“ и „Мерцедес-Бенц“, електронското мерење им овозможува на возачите лесно да го проверат нивото на маслото и да добијат предупредување кога тоа отстапува од дозволените вредности.
На овој начин, проблемите може навреме да се откријат, а ризикот од оштетување на моторот да се намали.
Проверката со класична шипка бара одредено знаење. Ознаките за минимално и максимално ниво може да се разликуваат, а резултатот зависи и од тоа дали автомобилот е паркиран на рамна површина, како и од температурата на моторот и начинот на мерење.
Погрешното отчитување може да доведе до додавање премала или преголема количина масло. И во двата случаи може да настанат проблеми, особено кај современите мотори, кои бараат точно определен вид и количество.
Мајкл Кросен од организацијата „Consumer Reports“ предупредува дека возачите понекогаш додаваат премногу масло кога ќе забележат дека нивото е ниско. Проблем може да настане и ако употребат масло со несоодветна спецификација.
Поради тоа, електронскиот систем им овозможува на производителите да ја стандардизираат постапката за мерење и да ја намалат можноста за човечка грешка.
Постои и безбедносна причина за оваа промена. Сè повеќе автомобили имаат хибриден погон, а работата под хаубата може да биде посложена поради високонапонските системи. Затоа, производителите настојуваат да ги ограничат интервенциите за кои е потребно посебно знаење.
Отстранувањето на шипката може да ги намали и трошоците за производство, особено кај возилата што веќе имаат електронски сензори и дигитален приказ на податоците.
Сепак, електронската проверка не е нужно попрактична за секого. Возачите што сакаат брзо да го проверат нивото на маслото без да пребаруваат низ менијата може да сметаат дека класичната шипка е поедноставно решение.
Најважно е да се следат упатствата на производителот, нивото на маслото да се проверува на пропишаниот начин и да се користи исклучиво масло со соодветна спецификација.
