Навиките на европските патници значително се менуваат, што директно влијае врз изборот на периоди за одмор и туристичките дестинации. Сè поизразен станува трендот на патување кон помалку пренатрупани локации, надвор од летниот шпиц, како и зголемената популарност на кратките градски патувања во Европа.
Овој феномен е особено видлив и во Грција, која бележи зголемен туристички прилив не само кон Атина, туку и кон Солун во текот на целата година.
За грчкиот туризам, ваквите промени претставуваат предупредување и сигнал за промена на стратегијата. Во популарни и меѓународно познати дестинации како Миконос и Санторини, сликите од пренатрупани улици, долги чекања и оптоварена инфраструктура за време на летната сезона предизвикуваат незадоволство кај дел од туристите со повисоки барања.
Според нова студија на Европската туристичка комисија, 64% од Европејците изразуваат силна намера за патување и подготвеност за поголема потрошувачка. Осум од десет планираат патувања во Европа, а четири од десет издвојуваат буџет поголем од 1.500 евра.
Сè поголем дел од патниците се насочуваат кон алтернативни дестинации, избираат подолги престои и патуваат надвор од главната сезона. Околу 51% избираат помалку популарни места, додека 10% се одлучуваат за пооддалечени и поавтентични региони.
