Marvel ја откри новата актерска екипа за долгоочекуваниот филм „X-Men“, кој во кината треба да пристигне на 5 мај 2028 година. Дел од новите имиња беа претставени на настанот D23 на Disney во Анахајм.
Кристофер Абот ќе ја толкува улогата на Чарлс Ксавиер, познат како Професор Икс, додека Адам Драјвер ќе се појави во улогата на Магнето. Во новата екипа се и Инде Наварете, која ќе ја игра Роуг, и Маја Бојд како Сторм, објави Deadline.
Претходно беше потврдено дека Самара Вивинг ќе ја толкува Ема Фрост, а Кит Конор ќе го игра Киклоп. На сцената во Анахајм се појави и Сејди Синк, која во филмот ќе ја игра Џин Греј.
Адам Драјвер се вклучи преку видеоразговор и, во шега, првично изјави дека ќе го игра Магнето, по што се исправи и рече дека всушност станува збор за Натанјел Милбери.
Изборот на актерите за новата генерација мутанти траеше со месеци и беше опишан како еден од најобемните кастинг-процеси во Холивуд. Режисерот Џејк Шрајер и претставници на Marvel во текот на летото одржувале бројни состаноци и аудиции.
Професорот Икс, основач и лидер на X-Men, за првпат се појави во стриповите во 1963 година. Во филмската франшиза, која започна во 2000 година, ликот го прослави Патрик Стјуарт, додека Џејмс Мекавој го толкуваше помладиот Ксавиер во филмовите од 2010-тите.
Стјуарт повторно ќе се појави како Професор Икс во претстојниот „Avengers: Doomsday“.
Новиот филм за X-Men доби дополнителен замав откако Marvel го ангажираше Шрајер за режисер, а за сценариото се задолжени Ли Сунг Џин, авторот на „Beef“, и Џоана Кало, коавторка на „The Bear“.
Обожавателите го очекуваат враќањето на X-Men во Marvel уште од 2019 година, кога Disney ја презеде компанијата 20th Century Fox, заедно со правата и каталогот поврзани со популарната франшиза.
