Сè повеќе млади девојки бараат естетски операции за намалување на стапалата и стеснување на рамената, додека дел од мажите сакаат пошироки рамена, предупредуваат естетски хирурзи од Турција. Според нив, ваквите барања сè почесто се поттикнати од влијанието на социјалните мрежи.
Професорот и доктор Јакуп Чил вели дека пациентките бараат помали стапала со образложение дека така чевлите би изгледале поубаво и поелегантно. Девојките, исто така, сакаат потесни рамена за облеката да им стои поелегантно, додека мажите сè почесто бараат хируршки интервенции за нивно проширување.
Лекарот предупредува дека овие операции не се едноставни како што изгледаат на социјалните мрежи и дека треба да се изведуваат само кога постои вродена аномалија.
Вонредниот професор Емре Хоџаоглу од Медицинскиот факултет во Истанбул посочува дека сè почесто младите бараат од родителите естетски операции како подарок за успешно завршена учебна година. Според него, интервенциите со филери за зголемување на усните веќе станале широко прифатени.
Хирурзите предупредуваат дека секоја операција носи одредени ризици, поради што е важно пациентите да избираат квалификувани и искусни лекари. Дополнително, забележуваат дека возрасната граница за естетски интервенции значително се намалува.
