Платформата Икс зазема поостар став кон корисниците кои се обидуваат да ја злоупотребат нејзината програма за споделување приходи со креаторите, така што вештачки привлекуваат интеракции и крадат туѓа содржина.
Вообичаено е виралните содржини повторно да кружат на интернет, особено на платформи како Икс, каде што таквите објави можат да донесат лајкови, нови следбеници, а во некои случаи и директна заработка. Со овој проблем се соочуваат и Инстаграм, Фејсбук и Редит, кои веќе воведоа технички мерки за препознавање на повторно објавена туѓа содржина без наведување на изворот.
Икс неодамна воведе подобрен уредувач на видеа и алатка за снимање во обид да ги поттикне креаторите да користат сопствени алатки на платформата, наместо да преземаат туѓи содржини.
Сега Никита Бир соопшти дека најновата верзија на моделот за вештачка интелигенција „Грок“ може да препознава дуплирана содржина трипати побрзо од претходната верзија. Освен тоа, додавањето водени жигови, воведни шпици или други измени со кои се создава впечаток дека украдената содржина е оригинална, ќе резултира со тоа приходите од монетизираните прегледи да бидат пренасочени кон вистинскиот автор. Истото правило ќе важи и за копирани вирални текстуални објави.
Бир наведе дека компанијата во последниот циклус открила 1,5 милиони украдени објави, без да прецизира на кој временски период се однесуваат тие податоци. Тој истакна дека благодарение на новите мерки повеќе од еден милион долари приходи ќе им бидат вратени на оригиналните автори на украдената содржина.
Со оглед на тоа што вештачката интелигенција го олесни создавањето на вакви злоупотреби, Икс работи и на побрзо откривање и суспендирање на ботови. Во април Бир изјави дека платформата идентификува и суспендира 208 ботови во минута, а таа бројка постојано расте.
Од Икс порачуваат дека повторените или намерните обиди за заобиколување на новата политика ќе резултираат со исфрлање на корисниците од програмата за креатори. Истото ќе важи и за корисниците кои намерно се обидуваат да изнудат интеракции и нови следбеници. Доколку некој биде фатен три или повеќе пати, на пример со објави од типот „Ќе го заследам секој што ќе одговори“, неговата сметка ќе биде отстранета од програмата за креатори и проследена до тимот за безбедност и правила, кој може да донесе одлука за суспензија на профилот.
Бир и претходно јавно го критикуваше таканареченото „мамење за интеракции“ на платформата, а меѓу другото го посочи и еден од најпознатите креатори на содржини, Мистер Бист, обвинувајќи го дека често користи финансиски поттик за да ги натера луѓето да ги гледаат неговите видеа.
