Европската Унија воведе привремена царинска такса од три евра за производите што пристигнуваат во пратки од земји надвор од Унијата, со што дополнително ќе поскапи купувањето преку кинеските интернет-продавници „Тему“, „Шеин“ и „Алиекспрес“.
Со новите правила е укинато досегашното ослободување од царина за пратки со вредност до 150 евра. Одлуката е донесена со цел да се намали масовниот прилив на евтини производи од Кина и да се воспостави построга контрола врз нивниот увоз.
Според Европската комисија, привремената такса ќе остане во сила најмалку до 2028 година.
Доколку купувач нарача три исти маици, ќе плати дополнителни три евра, а ако нарача една маица и футрола за мобилен телефон, ќе плати шест евра. Тоа покажува дека надоместокот се пресметува според видот на производите во пратката.
Европската комисија соопшти дека бројот на пратки со мала вредност што пристигнуваат во Европската Унија пораснал од 1,3 милијарди во 2022 година на 5,9 милијарди во 2025 година, при што околу 90 проценти од нив потекнуваат од Кина.
Истражување на Европската Унија покажало дека околу 60 проценти од производите купени преку интернет и увезени од земји надвор од Унијата не ги исполнуваат европските безбедносни стандарди, што претставува потенцијален ризик за потрошувачите.
Минатиот месец европските регулатори ја казнија компанијата „Тему“ со 200 милиони евра затоа што не спречила продажба на незаконски и опасни производи.
Новите мерки се однесуваат исклучиво на земјите членки на Европската Унија. За купувачите во Македонија засега нема промени, освен ако самите интернет-продавници не ги изменат цените или трошоците за испорака.
