Стриминг-сервисот Spotify објави дека корисниците на неговиот премиум пакет во иднина ќе можат да водат интерактивни разговори со асистент базиран на вештачка интелигенција за музиката и другите аудиосодржини што ги слушаат.
Функцијата во почетокот ќе биде достапна во САД, Ирска и Шведска, за корисници на оперативните системи iOS и Android постари од 18 години, а засега ќе работи исклучиво на англиски јазик.
Станува збор за бета-верзија, што значи дека системот можеби нема секогаш да функционира совршено. Повратните информации од корисниците ќе помогнат во понатамошниот развој и подобрување на алатката.
За разлика од претходните функции со вештачка интелигенција, како виртуелниот диџеј кој работи еднонасочно, новиот асистент овозможува вистински двонасочен разговор преку почетниот екран на апликацијата и преку приказот на песната што моментално се репродуцира.
Корисниците ќе можат да внесуваат пораки или да ѝ се обраќаат на апликацијата со глас за да ја прецизираат потрагата во текот на разговорот.
На пример, корисникот ќе може да побара: „Пушти ми изведувачи кои никогаш претходно не сум ги слушал“, а потоа да продолжи со дополнително барање: „Нека бидат со побрз ритам и додади некој понов изведувач“.
