Новиот психолошки трилер „Verity“, снимен според истоимениот бестселер на Колин Хувер, пристигна во кината на почетокот на октомври, но првите реакции покажуваат голема разлика меѓу критичарите и публиката.
Филмот го режираше Мајкл Шоволтер, а главните улоги ги толкуваат Ен Хатавеј, Дакота Џонсон и Џош Хартнет. Станува збор за уште една филмска адаптација на дело на Хувер, чии книги во последните години стекнаа голема популарност.
На „Rotten Tomatoes“ филмот во моментов има само 34 отсто позитивни критики од професионалните критичари. Публиката е значително позадоволна, со 70 отсто позитивни оценки.
Критичарите, меѓу другото, му забележуваат на филмот дека не е доволно напнат и вознемирувачки во споредба со книжевниот предлошок.
Приказната ја следи писателката Ловен Ешли, која ја игра Дакота Џонсон. Таа добива задача да го доврши серијалот на успешната авторка Верити Крафорд, која по сообраќајна несреќа повеќе не може да пишува.
Ловен пристигнува на имотот на семејството Крафорд, каде што наоѓа вознемирувачки автобиографски белешки на Верити. Во исто време започнува да се зближува со нејзиниот сопруг Џереми, кој го игра Џош Хартнет.
Како што се развива приказната, на Ловен ѝ станува сè потешко да разликува што е вистина, а што фикција и манипулација.
И покрај негативните критики, интересот на публиката засега е голем. Филмот од претпремиерните проекции заработил 4,5 милиони долари, додека во првиот ден од прикажувањето во САД и Канада заработил 15,1 милион долари и се искачил на првото место на дневната листа.
Од „Amazon MGM“ проценуваат дека „Verity“ би можел да заработи околу 33,6 милиони долари во првиот викенд. Конечните бројки сè уште не се познати, но досегашните резултати покажуваат дека негативните критики засега не го намалиле значително интересот за новата адаптација на популарниот роман на Колин Хувер.
