Четворица членови на екипажот на мисијата SpaceX Crew-13 стигнаа до Меѓународната вселенска станица (МВС) за само седум часа и 55 минути, со што е поставен нов рекорд за најбрзо патување до станицата со американско вселенско летало со екипаж, соопшти НАСА.
Мисијата беше лансирана од станицата на американските вселенски сили Кејп Канаверал на Флорида. Екипажот го сочинуваат астронаутите на НАСА Џесика Воткинс и Лук Дилејни, канадскиот астронаут Џошуа Катрик и рускиот космонаут Сергеј Тетерјатников.
Екипажот полета од Флорида вчера во 17:10 часот по средноевропско време, а на МВС пристигна во 1:05 часот по полноќ. Воткинс е командант на мисијата, Дилејни е пилот, додека Катрик и Тетерјатников се специјалисти на мисијата. За Воткинс ова е второ патување во вселената, додека за останатите тројца е прв престој во орбитата.
Лансирањето на Crew-13 првично беше планирано за средината на септември, но беше одложено откако при подготовките беше откриено истекување во системот на капсулата „Dragon“. НАСА и „SpaceX“ потоа го заменија вентилот во погонскиот систем и лансирањето беше презакажано за почетокот на октомври.
Екипажот се очекува да помине околу шест месеци на МВС. Меѓу другото, ќе истражува ткива добиени од човечки матични клетки со цел подобро разбирање на срцевите заболувања и Паркинсоновата болест, одгледување растенија за долготрајни вселенски мисии и промените во циркулацијата на крвта во услови на микрогравитација.
Резултатите од истражувањата би требало да придонесат и во подготовките за идните мисии до Месечината и Марс.
По пристигнувањето, Crew-13 им се придружи на членовите на Експедицијата 75, кои веќе престојуваат на станицата. По примопредавањето на должностите, екипажот на Crew-12, кој на МВС се наоѓа од февруари, треба да се врати на Земјата.
Меѓународни екипажи непрекинато престојуваат и спроведуваат истражувања на МВС од 2000 година. Станицата орбитира околу Земјата со брзина од околу 28.000 километри на час и прави целосен круг околу планетата за приближно 90 минути.
Иако Crew-13 постави рекорд меѓу американските вселенски летала со екипаж, не станува збор за апсолутно најбрзо патување до МВС. Тој рекорд сè уште го држи руското летало „Сојуз“, кое во октомври 2020 година стигнало до станицата за нешто повеќе од три часа.
