Нов спор меѓу технолошките гиганти OpenAI и Apple се отвори по обвинувањата дека поранешен вработен во компанијата за вештачка интелигенција префрлил повеќе од 100 датотеки за сè уште необјавен производ на своја приватна сметка, а потоа, откако се вработил во Apple, одржал презентација за истиот уред пред раководството на новиот работодавач.
Обвинувањата се содржани во судски поднесок што OpenAI го доставил до федералниот суд во Сан Хозе, а за кој известува Ројтерс. Според компанијата, презентацијата била одржана пред неколку месеци.
Од OpenAI изразиле загриженост дека нивните деловни тајни и доверливи информации сега се достапни во Apple, чии инженери би можеле да ги искористат при развојот на идните производи. Како пример за напорите на Apple во областа на вештачката интелигенција, во поднесокот е наведен уредот HomeView, претставен оваа недела.
„OpenAI е исклучително загрижен бидејќи неговите деловни тајни и доверливи информации сега кружат во рамките на Apple“, се наведува во судскиот документ.
Apple ги отфрли обвинувањата, наведувајќи дека има јасни правила и постапки со кои се спречува нововработените да користат доверливи податоци од претходните работодавачи. Од компанијата додаваат дека не пронашле докази што би ги потврдиле наводите на OpenAI.
Најновиот поднесок е дел од поширокиот судски спор околу деловните тајни, што Apple го започна претходно оваа година. Тогаш Apple тврдеше дека негови поранешни вработени преминале во одделот за хардвер на OpenAI, носејќи со себе доверливи информации. OpenAI ги отфрли и тие обвинувања.
Спорот меѓу двете компании се одвива во време кога технолошките гиганти вложуваат во развој на сопствени уреди и производи поврзани со вештачката интелигенција, а доверливите информации и деловните тајни стануваат предмет на сè поголеми правни спорови.
