OpenAI најави нова верзија на ChatGPT наменета за корисници на возраст од 13 до 17 години, со посебни безбедносни заштити, родителска контрола и функции за учење.
Новото искуство треба да биде стандардно за тинејџерите, а е развиено во соработка со Универзитетот „Стенфорд“. Наместо едноставно да им дава готови одговори, системот ќе биде насочен кон тоа учениците сами да доаѓаат до решенијата.
Меѓу новите функции се најавени квизови, потсетници за одговорно користење на ChatGPT при изработка на домашни задачи и можност тинејџерот или родителот да определи периоди во кои ќе биде активен режимот за учење.
При првото поставување корисниците ќе добиваат предупредувања да не споделуваат приватни фотографии или фотографии со чувствителна содржина.
OpenAI воведува и дополнителни заштити за спречување емоционална зависност од ChatGPT. Системот нема да користи јазик што сугерира романтични чувства кон корисникот, ниту ќе тврди дека има лични чувства или свест.
ChatGPT, исто така, нема да се поставува себеси над семејството, пријателите, наставниците, менторите или други лица од доверба во животот на тинејџерот. Предвидени се и потсетници за правење пауза, како дел од мерките за поздрави навики при користењето.
Од OpenAI нагласуваат дека на тинејџерите јасно ќе им биде посочено оти ChatGPT е алатка, а не личност, и дека не може да ги замени човечките односи.
Новите мерки доаѓаат по случаи во кои тинејџери го користеле ChatGPT за време на сериозни емоционални и психички кризи.
