Компанијата OpenAI од понеделник, 24 август, започнува со прикажување реклами во ChatGPT за корисниците во 31 европска држава. Огласите ќе бидат достапни во бесплатната верзија и во пакетот „Go“, додека претплатниците на „Plus“, „Pro“ и „Enterprise“ ќе продолжат да го користат сервисот без реклами.
Со проширувањето на програмата, огласите во ChatGPT ќе бидат достапни на вкупно 40 пазари во светот. Тестирањето започна во февруари во САД, а потоа програмата се прошири и во други земји.
Во Европа, рекламите ќе се прикажуваат во земјите членки на Европската Унија, како и во Исланд, Лихтенштајн, Норвешка и Швајцарија.
Од OpenAI уверуваат дека разговорите на корисниците ќе останат скриени од огласувачите и дека личните податоци нема да се продаваат. Компанијата истакнува и дека рекламите ќе бидат јасно означени и одвоени од одговорите на ChatGPT, како и дека нема да влијаат врз одговорите што ги генерира системот.
Сепак, воведувањето реклами отвора прашања во Европа, особено во однос на можноста за манипулација преку персонализирани разговори. Здруженијата за заштита на потрошувачите предупредуваат дека комерцијалната порака во разговор со вештачка интелигенција може потешко да се препознае отколку класичен интернет-оглас.
Паралелно со тоа, Европската комисија разгледува дали функцијата за пребарување во ChatGPT треба да биде опфатена со посебни обврски според Актот за дигитални услуги, со оглед на големиот број корисници на платформата во ЕУ.
