Компанијата „ОпенАИ“ соопшти дека забранила група профили на „Четџипити“ поврзани со Русија, кои според истрагата биле користени како дел од тајна онлајн кампања за влијание и ширење дезинформации.
Случајот бил откриен во рамки на истрага за објави на социјалните мрежи, генерирани со помош на вештачка интелигенција, што ја довело компанијата до поширока операција за влијание.
Според „ОпенАИ“, кампањата била организирана околу веб-страница со копирани и погрешно припишани академски трудови, како и „индекс на суверенитет“, кој ја прикажувал Русија во позитивно светло. Операторите, исто така, се обидувале да го прикријат руското потекло на кампањата.
Иако „ОпенАИ“ не дозволува пристап до своите модели од Русија, компанијата утврдила дека операторите користеле ви-пи-ен мрежи за да ја прикријат својата вистинска локација.
Операторите внесувале инструкции на руски јазик за создавање коментари за социјалните мрежи, кои потоа биле објавувани на „Сабстек“, „Телеграм“, „Икс“, „Фејсбук“ и „Линкедин“. Од „ОпенАИ“ наведуваат дека на „Четџипити“ му било наложувано да ги отстранува јазичните карактеристики кои би можеле да откријат дека содржината потекнува од Русија.
Голем дел од содржината ја промовирала организацијата „Интернешнал Бурке Институт“, чија веб-страница содржела копирани академски трудови, во одредени случаи со лажно наведени автори.
Кампањата создала и таканаречен „индекс на суверенитет“, кој, според компанијата, ја величел Русија и ги омаловажувал западните земји.
„ОпенАИ“ оценува дека непосредниот досег на операцијата бил ограничен, но дека нејзиното значење е во инфраструктурата што била изградена за создавање привид на авторитет и прикривање на потеклото на одредени наративи.
Ова е уште еден случај во кој „ОпенАИ“ открива употреба на своите алатки во операции за влијание. Компанијата во февруари соопшти и дека затворила профили поврзани со „Рајбер“, проруска медиумска компанија за која британската влада тврди дека е поврзана со руските власти.
