Германската модна компанија Hugo Boss објави дека нејзината оперативна добивка (EBIT) во првиот квартал од 2026 година паднала на 35 милиони евра, но и покрај тоа ја надминала просечната прогноза на аналитичарите од 30 милиони евра, а пазарите реагирале со раст на акциите од пет отсто.
Извршниот директор на компанијата, Даниел Гридер, наведе дека почетокот на годината бил во согласност со планот за реструктурирање, но дека пазарното опкружување станало значително потешко поради геополитичките случувања околу Ормускиот теснец, пренесува Ројтерс.
Војната на Соединетите Американски Држави и Израел против Иран негативно влијаела врз потрошувачката и продажбата на клучните пазари, особено на Блискиот Исток.
Компанијата истакна дека падот на посетите во продавниците во тој регион започнал од март, додека глобалната потрошувачка побарувачка останала слаба.
Hugo Boss проценува дека глобалните трендови и воените ефекти ја намалиле вкупната продажба за околу еден отсто, додека засега не е забележано директно нарушување во синџирите на снабдување.
Вкупните приходи од продажба паднале за шест отсто на годишно ниво на 905 милиони евра, што го одразува намерното прилагодување на брендот и продажните канали во рамки на стратегијата. Иако приходите се пониски, Hugo Boss забележа подобрување на бруто-маржата на 62,5 отсто, како и раст на слободниот готовински тек на 33 милиони евра, во споредба со негативните 66 милиони евра една година претходно.
Компанијата истовремено продолжува со реструктурирањето, вклучително и затворање продавници и оптимизација на дистрибутивната мрежа, додека во фокус е зајакнување на брендот преку модни настани како Миланската недела на модата и кампањи за новите колекции, пренесува порталот Фешн нетворк.
Hugo Boss ја задржа претходната годишна прогноза и очекува оперативна добивка во опсег од 300 до 350 милиони евра во 2026 година.
