Најавениот концерт на српската пејачка Јелена Карлеуша во Водице, Хрватска, е откажан по неколкудневни бурни реакции во јавноста.
Настапот требаше да се одржи на 15 август, на празникот Голема Госпа, во клубот Хациенда. Сепак, најавата предизвика низа политички и општествени реакции, по што клубот соопшти дека настапот нема да се одржи.
Од Хациенда наведоа дека реакциите го надминале вообичаениот интерес за музички настан и дека поради тоа била донесена одлука концертот да биде откажан.
„Ниту еден изведувач и ниту еден настан не се поважни од безбедноста на нашите гости и вработени“, порачаа од клубот.
На настапот му се спротивставија дел од граѓаните и здруженија на бранители, главно поради јавните политички ставови и изјави на Карлеуша во изминатите години. На социјалните мрежи беа упатени и повици за бојкот, како и барања организаторите да се откажат од концертот.
Претходно реагираше и градоначалникот на Водице, Анте Цукров, кој оцени дека настапот е несоодветен и порача дека, поради нејзините претходни јавни настапи и изјави, Карлеуша не е добредојдена во градот.
Од клубот, сепак, нагласија дека Хациенда останува место посветено на музиката, забавата и добрата атмосфера.
