На хрватското приморје е откриена голема измама во која туристи добиваат лажни пораки преку WhatsApp со цел да им се украдат пари, пренесува Index.
Десетици илјади туристи кои имаат резервирано сместување во хотели на Јадранот овие денови добиле пораки во кои се бара да внесат податоци од банкарска картичка или да направат дополнителна уплата за сместување. Станува збор за измама која е поврзана со протекување на лични податоци на околу 100.000 гости, според неофицијални проценки.
Податоците, како што се наведува, најверојатно протекле од хрватската платформа Phobs, која се користи за управување со хотелски резервации. Украдени се имињата и презимињата, телефонските броеви, датумите на пристигнување и заминување, како и името на хотелот. Благодарение на овие информации, измамниците испраќаат убедливи пораки кои изгледаат веродостојно.
Хрватската Агенција за заштита на лични податоци потврдила дека е пријавен безбедносен инцидент поврзан со повеќе корисници и компании, додека од компанијата Phobs соопштиле дека преземаат мерки за истрага и заштита на системот.
Од компанијата наведуваат дека финансиските податоци не биле компромитирани и дека не станува збор за директен упад во системот, туку за безбедносен пропуст што се уште се анализира.
Платформата Phobs ја користат големи хотелски групации во Хрватска и регионот, а надлежните апелираат туристите да не одговараат на сомнителни пораки и да не внесуваат податоци од платежни картички.
