Новата меѓународна кампања на Виенскиот туризам „Wanderful Vienna“ ја претставува Виена како град на културата, уметноста и просторот за одмор.
Виена не мора да се посетува според принципот „што повеќе знаменитости за што пократко време“.
Новата кампања ги повикува посетителите да забават, да прошетаат и да го откријат градот меѓу неговите најпознати културни и историски знаменитости. Кампањата ја става во фокус посебноста на Виена.
Парковите, плоштадите и мирните улици стануваат дел од туристичкото доживување исто колку и музеите, палатите и знаменитостите по кои е познат австрискиот главен град.
„Виена не е град што треба да се посетува според принципот на список за проверка. Нејзиниот вистински ефект често се открива токму меѓу знаменитостите, за време на прошетка низ парк, во мирна улица или на патот од едно културно доживување до друго“, рекол директорот на Виенскиот туризам, Норберт Кетнер.
Според него, спојот на врвната култура и квалитетот на живот претставува една од најголемите меѓународни предности на Виена.
Кампањата до 3 ноември се промовира на големи рекламни површини во Њујорк, Торонто и Лондон, а ја следат и објави во водечки меѓународни медиуми за животен стил.
Визуелниот идентитет на кампањата се темели на идејата за прошетката како уметност. Пораката на кампањата особено добива значење во време на забрзан начин на живот и сè поизразена потреба на патниците за поспоро, автентично и посвесно искуство.
На интернет-страницата wanderful.vienna.info посетителите можат да најдат водич, како и интерактивен квиз кој, врз основа на нивните интереси, препорачува соодветна рута за прошетка низ Виена.
