Памукот, ленот и бамбусот се меѓу најдобрите материјали за постелнина, но секој од нив има свои предности и недостатоци, посочуваат текстилните експерти.
Памукот е најчестиот избор бидејќи нуди високо ниво на удобност и добра пропустливост на воздухот. На неговиот квалитет влијаат повеќе фактори, меѓу кои квалитетот на влакната, начинот на ткаење, густината на ткаенината и обработката на материјалот.
Експертите советуваат при купување да се провери и колку производителот води сметка за одржливото производство.
Дизајнерот на ентериер Банџо Бил препорачува постелнина од лен.
„Кога еднаш ќе се одлучите за лен, повеќе нема да се вратите на друг материјал. Тој е исклучително пропустлив и овозможува одлична циркулација на воздухот“, вели Бил.
И памукот и ленот се природни материјали добиени од растенија. Иако двата се издржливи и удобни, ленот е попропустлив за воздух благодарение на пореткото ткаење, а воедно има и хипоалергени својства.
Постелнината од бамбус се одликува со свиленкаста текстура, добро ја впива и одведува влагата, а има и антибактериски и антигабични својства. Сепак, експертите предупредуваат дека при производството на некои бамбусови ткаенини се користат хемикалии кои можат да имаат негативно влијание врз животната средина.
За одржување на постелнината се препорачува перење на 40 степени Целзиусови или на еколошка програма од 30 степени, додека кај почувствителните материјали, како што е бамбусот, потребна е дополнителна внимателност.
