Дел од оригиналното спирално скалило на Ајфеловата кула е продаден за повеќе од 450.000 евра на аукција во Париз.
Купувачот, кој присуствувал во аукциската сала, станал сопственик на сегмент од скалите со 14 скалила, висок 2,7 метри и тежок 1,4 тони. Станува збор за дел изработен во 1889 година, кога била завршена Ајфеловата кула.
„Кога купувате дел од Ајфеловата кула, купувате дел од Париз, заедно со целата симболика што ја претставува“, изјавила Сабрина Дола, директорка за арт деко дизајн во аукциската куќа „Арткуријал“, каде што се одржала продажбата.
Пред повеќе од четири децении, околу 160 метри од оригиналното скалило биле исечени на помали делови и продадени, а на нивно место биле поставени лифтови што денес ги превезуваат посетителите до видиковецот на кулата.
Делот продаден во четвртокот достигнал цена од 450.160 евра, што е трипати повеќе од проценетата вредност пред аукцијата, која изнесувала меѓу 120.000 и 150.000 евра.
Во 2008 година, друг дел од скалилото бил продаден на приватен американски купувач за рекордни 550.000 евра.
