Вајбер подготвува нов начин за испраќање и барање пари, со што корисниците ќе можат финансиските трансакции да ги започнуваат директно од разговор во апликацијата.
Новата услуга на „Ракутен Вајбер“ најпрво ќе биде воведена во Србија, каде што се очекува да стане достапна за помалку од 30 дена. Зад развојот на сервисот стојат „Ракутен Вајбер“, Народната банка на Србија и „Пејчет“.
Постапката ќе започнува во чет-ботот на Вајбер. Корисникот ќе избере лице, ќе го внесе износот и потоа ќе биде пренасочен во својата апликација за мобилно банкарство. Таму ќе ја потврди уплатата, а самата трансакција ќе ја реализира банката. „Пејчет“ ќе ја обезбедува врската меѓу двете апликации.
Според најавата, сервисот нема да ги чува средствата на корисниците и нема да има пристап до нивните ПИН-кодови, лозинки или еднократни банкарски кодови. Потврдата за плаќањето ќе остане во банкарската апликација.
Иако првично е наменет за Србија, од Вајбер наведуваат дека постои можност услугата подоцна да биде проширена и на други пазари во регионот. Засега нема потврда дали и кога ќе биде достапна во Македонија.
Компанијата во дел од европските земји веќе ја нуди услугата „Вајбер пеј“, која овозможува директно испраќање пари, но Македонија во моментов не е опфатена со оваа услуга.
