Европската комисија повторно ја отвора можноста за патување со воз низ Европа за младите. Овој пат ќе бидат доделени повеќе од 40.000 карти за лица родени помеѓу 1 јули 2007 и 30 јуни 2008 година, а право на пријавување имаат и млади од Македонија.
Пријавувањето е можно и пред да се наполни 18 години, но учесниците мора да бидат полнолетни пред почетокот на патувањето. Младите можат да се пријават поединечно или како група од максимум пет лица преку Европскиот портал за млади до 22 април напладне. По пријавувањето, учесниците треба да решат краток квиз за општо знаење за Европската унија и едно прашање за процена.
Пријавите потоа ќе бидат разгледани од Комисијата и Извршната агенција за европско образование и култура. Победниците ќе имаат можност бесплатно да патуваат со воз низ ЕУ во периодот од 1 јули 2026 до 30 септември 2027 година. Патувањето може да трае до 30 дена, од кои најмногу седум дена со воз.
Од почетокот на оваа популарна програма, повеќе од 1,9 милиони млади се пријавиле, а околу 431.931 од нив веќе добиле карта.
