Иако PlayStation 5 е на пазарот од ноември 2020 година, сè уште нема официјална најава кога ќе пристигне неговиот наследник. Sony потврди дека работи на конзола од новата генерација, но не откри датум на претставување ниту очекувана цена.
Според досегашниот ритам на Sony, новите генерации конзоли се појавуваат на секои шест до седум години, што остава можност PlayStation 6 да пристигне во 2027 година. Сепак, сè почесто се споменува и 2028 година поради растечките трошоци за производство и недостигот од одредени компјутерски компоненти.
Една од причините е брзиот развој на вештачката интелигенција, кој ја зголемува побарувачката за меморија и други компоненти потребни за центрите за податоци. Тоа доведува до потешка набавка и повисоки цени, што директно влијае врз производителите на конзоли.
Претседателот и извршен директор на Sony, Хироки Тотоки, потврди дека компанијата сè уште нема одлука за датумот на претставување и цената на новата конзола. Тој посочи дека цените на меморијата би можеле да останат високи во текот на целата финансиска 2027 година, која завршува во март 2028 година.
Иако 2028 година се споменува како можна година за пристигнување на PlayStation 6, Sony засега не потврдил одложување, ниту официјално утврдил датум за премиерата.
Дополнително, незадоволство кај дел од корисниците предизвика и најавата на Sony дека од јануари 2028 година ќе престане со производство на физички изданија на новите игри за PlayStation. Тоа е промена што особено ги засега играчите кои претпочитаат да купуваат игри на дискови.
Цената и датумот на пристигнување на PlayStation 6 остануваат непознати, а сè ќе зависи и од движењето на цените и достапноста на компонентите.
