Германскиот производител на батерии Варта поднесе барање за започнување претходна постапка за несолвентност со самостојно управување, во обид да ја обезбеди економската иднина на компанијата и да овозможи одржливо продолжување на работењето.
Постапката не се однесува само на матичната компанија на групацијата Варта, со седиште во јужна Германија, туку и на нејзините оперативни зависни компании.
Како главни причини за новата криза, компанијата ги наведе значително влошените услови на пазарот, намалената побарувачка, негативното влијание на девизните курсеви, како и неодамнешната одлука на еден од клучните клиенти да ја прекине соработката со Варта.
Овој потег следува по информациите дека компанијата, со седиште во близина на јужногерманскиот град Елванген, се соочува со можност за поделба, бидејќи големи инвеститори сакаат да се ослободат од бизнисот со батерии за широка потрошувачка.
Групацијата на доверители, составена од „Дојче банк“ и финансиските инвеститори RBC BlueBay, Blantyre и Whitebox, своите одлуки ги образложија со тешката финансиска состојба во која се наоѓа компанијата.
Независна анализа покажала дека на Варта итно ѝ се потребни дополнителни средства од неколку десетици милиони евра. И покрај интензивните преговори, ниту еден инвеститор не бил подготвен да обезбеди дополнителен капитал.
Компанијата вработува околу 3.260 луѓе, од кои голем дел работат во седиштето во Елванген.
Последните финансиски податоци Варта ги објави во 2024 година. Тогаш компанијата остварила приходи од околу 793 милиони евра и забележала загуба од 64,5 милиони евра.
Освен добро познатите батерии за широка потрошувачка, групацијата произведува и микробатерии за слушни апарати, како и системи за складирање енергија.
Варта и во 2024 година спроведе преструктуирање според германскиот закон за преструктуирање на компании со цел да избегне несолвентност. Тогаш постојните акционери ги загубија своите удели, а доверителите се откажаа од дел од своите побарувања.
