Градот Ровињ, кој е најпосетуван во Хрватска, планира да го ограничи отворањето нови апартмани поради сè поголемите гужви и притисокот врз инфраструктурата.
По примерот на Барселона, Атина и Фиренца, Ровињ би можел да стане уште еден европски град каде одреден период нема да се дозволува отворање нови приватни сместувачки капацитети.
Градоначалникот на Ровињ најави воведување двегодишен мораториум за издавање нови решенија за категоризација на апартмани во старото градско јадро.
Ровињ минатата година забележал речиси 4,5 милиони туристички ноќевања и е најпосетуван град во Хрватска. Од вкупно околу 38.500 легла, приватното сместување учествува со околу 30 проценти.
Во екот на сезоната градот е преполн со туристи, а проблеми стануваат паркингот, квалитетот на услугите и животот на локалното население.
Претставници на приватниот сместувачки сектор предупредуваат дека мерката може да отвори простор за нелегално издавање, но сметаат дека со апартмани треба да управуваат локални жители, а не инвеститори кои купуваат недвижности само за заработка.
Ако планот биде усвоен, во Ровињ следните две години нема да има нови легални апартмани.
