Контроверзниот српски изведувач Драгомир Деспиќ – Десингерица беше приведен за време на полициска контрола во ноќен клуб во Сутоморе, Црна Гора, каде што настапувал.
Како што пренесуваат црногорските медиуми, полициски службеници од Одделението за безбедност Бар, во соработка со инспектори за странци, во текот на ноќта извршиле контрола на угостителскиот објект, при што биле приведени тројца државјани на Србија за утврдување на нивниот идентитет.
По проверката, Десингерица и уште двајца српски државјани биле казнети со по 200 евра бидејќи престојувале на територијата на Црна Гора без лични документи, со што го прекршиле Законот за странци.
По приведувањето, Десингерица кратко ја коментираше ситуацијата.
„Нема што... Тие си ја работат својата работа. Во принцип, секој тука најдобро си ја работи својата работа и на сите им е добро“, изјавил тој.
Полициската акција била спроведена меѓу два и три часот по полноќ на 18 јули.
При контролата, полицијата затекнала и 11 малолетници кои консумирале алкохол, поради што против правното лице и одговорното лице во клубот ќе биде поведена прекршочна постапка за овозможување точење алкохол на лица помлади од 18 години.
Во објектот било затекнато и едно лице кое работело без соодветна дозвола.
Надлежните инспекциски служби констатирале повеќе неправилности во работењето на клубот, поради што на правното и одговорните физички лица им биле изречени парични казни во вкупен износ од 11.200 евра.
Приведувањето на Десингерица доаѓа кратко откако дел од граѓаните на Црна Гора покренаа петиција со која бараат да му се забрани влез и настапување во земјата. Повод за тоа беше негов настап во Будва, за време на кој со машинка за шишање потстрижуваше момчиња од публиката, што предизвика бројни реакции.
